Rej će kogo, ovi Foka je iša na kvasinu pri nego ca je pamet ucini. A drugi će se nadovezat, ol je kal i bil olavija?! – E! I, imaju prov, oti ca prate vrime, i promine, i ku ga je komu do kojega kolina, ku isprida a ku ol nose – kuda ni lipo i jelno i drugu, ako se cini is pumnjum i pinku jubavi?! Pok još ako je šegac dobar, a drivo zdravu, za Guspu našu, i frotar bi štuvu naložil, neka govori da tu ni njeguv posol, nonke da bi mu to na pamet palo, e, do parve prilike! - pok sve tako, kako je komu tikva pala. Ma jopetac, jo govorin ca son i reka: Na dobro von Uskars, Lucani!
I Kucani. Nego kako! I svima vami koji jošće razumite ove naše beside ca zvone iz jelne, pok iz druge bonde vega našega škojića, ca se pari kako pinka polno neba, posri ve modre pjacere, a u nami se dviže kako nojveću bardo i nojlipji dolac posrid vega, i onega, i svakega drugega svita.
E, Uskars! Nego co? - Neka je lito, i neka su guzice vonka, i neka je žunj pasol a avgust pril vrota. Jerbo, ca je drugu nogo Uskars, kal mortvi govore, a živi pliju, po škorupu, i to ol vrimena, kako provju i kako je za vidit, onega ce se borzo dospilo, i još malo pok ga vej neće ni bit.
Portila je gajeta, a i nami zvun zvoni
Da mortvi? Da živi? Rej će oni ca štiju ovi deskurs, o cemu vi provje?!
Provjen, e, i provjat ću svima koga vidin! Jer cudo je bilo lipo. Sinuć. Na Luku. U Batariju. Di je Rošo jidro razapel ol jelne store luške gajete, koje vej ni, koja je portila u duge, a un se cini stot, pok ni dol gušta, ni za dobit, da je temu tako, nego je kako Isukarst mortve u žive prikarstivol, i svake pantomine provjol, da mi je u niku doba dušlo za se smijat na sva justa, pok son se i smijol, neka je sarce plakolo, i neka još place, jerbo mi se pari digod da mi koji smo ostali ni umrit ne znomo, onako pošteno, kako ca su živili naši stori, i stori ol naših storih, i njihovi stori, pok sve tako u starinu, do prin Isukarsta.
Niki don mi je jedon kumpor isprovjol koko smo mi Višani malamente i dereveršo, da nonkec ne znomo di smo se rodili, ni di živimo, ni ca jimomo. Pok se cudil križen božjin, kako tu more bit i zoc smo toko šempijoni? Da Taljonci imaju grod dvista godišć stariji ol Pariza, merokul bi ol tega ucinili, cili svit bi obo temu govoril i holi bi tamo kako ca se gre u Rim vidit Popu. A mi se smijemo kako kenja na pišotu i provjemo fjabe kako će barš kogo duć ol vonka i sve nos butat u jelnu velu škatulu. Bit će is fjokon. Za nos poslat pul Jamerik.
Nego, molojmo sal oto, za niku drugu zgodu. Ovodi son til reć ništo drugu. Til son napisat dvi tri beside obo jelnemu makakotu, i jelnuj gajeti ca je portila, obo nami koji smo ostali... Ma obo tuj gajeti štorija je velo i puno bi korte tukalo istratit za napisat svu tu fjabu, koja i ni fjaba, vengo goli život.
Život kojega se ispominjemo, i vi i jo. Život koji je utekal, koji se dospil, ol kojega su ostali sumo letrati i di kojo naša besida ca non zazvoni u jušima, pok zapaho na mladust, zazvoni na ditinjstvo, oldoje na nonota i nonu, vonje na ono ca je bilo, pok sarce zatrepeće somo ol sebe i oko se orosi, poltiho, da nikur ne vidi, da non se ne bi rugol, da non se ne bi smijol, a barž i olnil ono ca je sumo naše, ca pol kožu cuvomo, i nosimo kako znamen i zlamen, ca nos i cini tako smišnima kaki i jesmo.
Nisu to beside kako ove danas, ca se minjaju iz ure u uru, kako se koji program promini oli vapor doliže. Te beside pizaju veće ol nos. Jel nos svaki vitar more olnit, a ne duraju, i cuvaju u se, sve, i ono ca je bilo, i ono ca je pasalo, i no ca je ostalo i ono ca bi lešto niki vitar moga olnit. Besida pameti! Ona cuvo sve naše radosti i nevoje. Poznaje svaki naš škoš. I kako se smijemo i kako placemo. I kako se rugomo jedon drugemu. I kako ku koga gledo. Pok i kal snijemo, ote beside nos darže inkunjone, da se ne izvornemo na krivu bondu, da znomo koji smo, ca smo, di smo, kaki smo, da ne potonemo na dno ovega merokula ca ga zovemo život.
Ma tih besid sve je manje cut! Zakarambale su u niku vrime gluhu. I ostale tamo. U niku vrime pasonu. I nojde se di koji is kojin covik more poprovjat kako covik. Kojemu more reć sve ca mu je na sarce. Bez interpita i bez štropiti. Kojega more razumit, po šestu, po motu, i kal muci.
Portila je gajeta! A s njun i svit. Ostala je sumo raskvartono prova, kol Rošota u tejotar. I un! U svoju pantominu. Kako Isukarst isprid svuga greba, iz kojega je izoša ol kal je umor. I toti non provje besidu po besidu, facendu po facendu, kako umi i kako zno. Ma provje kako ca je nikal neće isprovjat ni jedon glumac. Jerbo glumac more duć i naucit di koju besidu. Ovu našu, višku. Ma znote kako je to? Jelno je naucit, a drugu je znat. Jerbo besida je isto kako i gajeta. U svakuj dudnji cili jedon svit. A tu se ne more nucit. U ti svit se tuko rodit, kako bi covik obo njemu cago moga i reć. Pok jopetac, da bi reka cago pametno, oto tuko i ćutit.
A koko je takih? – Je! Jo poznajen dvo-tri ca pišu, i još koju rukovicu koja umi proštit ca ta dvo-tri napišu.
Poritla je gajeta. I covik. I besida. Ostala je Veja. U kojuj mortvi govore ca bi tukali živi.
Kor i meso
Uru ipu durala je Rošotova batuda. Uru ipu ni okom nison trepal. Vej is parvin škošon ukarcol me u gajetu i olni tamo di ne more svak puj. U jelnu drugu vrime, u jedon pasoni svit, po kolima di je život balol dvo mijora godišć, a danas u njima mirine placu i kupina reste. Otvoril je vrota ol konobi, raspjantol škure, i mortvi su jopetac uskarsli. Poceli su vikat, vicijat se, beštimat, jelno drugu proklinjot i tarokat, a jelna je prefin golun guzicun holćala u Velu Selo cinit žuvit.
I jedon pop je vaze lemuzinu ol superbega svita, a jubov iskol ol onih ca jin se kožu dere i na suho i na mokro.
Kor i meso! – vikol je jedon.
– Kor i meso!
Ol gori ninder je zalampalo. I jo son vidil otega covika. Bus i gul, nasri kulfa mora Jadranskoga, dvigal se visoko povar svih nos. Obroz mu je bil nagrišpon kako kora ol borovine. Oci modre kako nojdubju more. Ruke i bedra kako sike ol barda olvoljene. A vlosi su mu strašinali sve u jedon plomik, kako sunce za zvizdana.
- Kor i meso!
Svako besida bila je moja. To je muj škuj. To je muj svit. To je muj covik. Oni ca je pasol, ovi ca je ostol, i ovi ca non se u son uvukal, pok non ne do ni napri ni nose.
Siniša Brajčić, oliti oni makako Rošo, svojin tejotron uspil mu je oživit – i kor i meso! U njegovemu tejotru Vis je uskarsal. I da je pameti, oti, i svaki taki Uskars bi se slavil kako zapovidni svetac.
Jerbo ni pinez kojima covik more kupit kortu za oti vapor koji vozi tamo di je portila ta naša gajeta, oklen dudnji ovi naš jazik. Kako i za sve, i za to se tuko rodit. I ćutit! Di pocimje smart? Di se dospije život?
I ca je to Vis, bez njih? Bez nos?
Vinko Kalinić - Foka
Na Luku, jelne litnje noći, u niku vrime gluhu
